VANNOI HOTLING CORONA NATNA

By Dr. Tingneo & Dr. Sennu

Corona “crown like surface spikes” ti chu ‘linglukhuh tobang melpu’ tina ahi. COVID-19 co(corona) vi(virus) d(disease) 19(2019).

Hiche natnapi thu a apoimo ho hi mijousen I hed tah diu tahsan a um in, hijeh chun basic hilou in, hed be dia lom themkhat ana veu hite.

Amasapen in hiche natna pi a thisetna/soset – na(mortality rate or fatality rate) anaveu hite; covid19; -3.7%(mi adammo 100 lah a 4 tobang hin thina a to thei) SARS COV-2; -10% (adammo 100 lah a 10 tobang thina toh thei). Hiche natna hi 2002 lai a, China gamkai mama a corona hitpi chi chombeh akon natna ahi. Tu- chung COVID-19 sang a sose leh huoise jo natpi ana hi in ahi.

Mers (middle east respiratory syndrome); -34% (Adammo 100 lah a 34 chung a thina lhut thei). Hiche natnapi hi 2012 lai a Saudi Arabia gamkai a, corona hitpi achi dang in ana lhunsah natna ahi. COVID-19 sang in ana sose in, a dammo tam tah thina chan gei lhut thei natna chu ahi. Ahileh tuchung natpi COVID-19 hi sosetna lhomjo ahin, ipi jeh a hibang a hi vannoi a ho ling jou ahidem?

Vannoi a natpi ahung lang teng leh, japi lah a akile thuh son na hi R*(read as R nought or R zero = reproductive ratio) a ki ti ji’n ahi. Covid19 R* hi 2-3 ahin, hichun pi aseina ham iti leh, mi 1 in mi 3 a pehson thei, mi 3 chun mi 9, mi 9 chun mi 27, hitobang a kipe son ji a, chom lou kah a mi tam tah chung a hung lhung thei natna khat ahin ahi. Hichu bou hilou in, adam- lou khat a hung khut teng leh a hitpi chu a kimvel a hui(air) a chu nidan 3(3hrs) sung hing thei ahin ahi. COVID-19 hitpi hi natna hitpi dang sang a gih jo ahijeh a chu, a dam lou pa/nu ahung khut teng leh hiche hitpi gih chu a nuoi lang ah hung leng suh ji a, a kom a um thil leh lo(thil keu) chung a chu ji ah ahi. Hiche hitpi hi thilkeu (eg-pen, paper, table, chair, cloths) chung a chuh tengleh, hui a aum sang in a hing sot jin ahi. Hiche thilkeu a ahin hi nidan 24 val jen hing ji ahijeh chun, hiche nidan 24 kah a koi tobang hiche corona hitpi um na thilkeu suhkha/ tongkha ho chun hiche natna hitpi hi bailam tah a ki lah doh theiji ahin ahi. Hiche hitpi a gih jeh a hi milham lah a na umteng leh metre 1 or feet 6 beh a nakom a pa toh na ki gam lhat leh kiveng jou ding nahi kiti ahi (social distancing).

Chu kit leh, SI (Series Interval) kiti khat a um in, COVID-19 a hiche SI chu 5-7 days tobang ahi. Hichun ipi a vedsah ham iti leh covid19 a dammo khat chun midang khat apehson leh, dammo na ki lahson pa chu ni 5-7 jou teng a dammo ahin kihed bep ji ahi. Hiche nikho hi a sao jeh hin, dammo na kilah doh pa chun, a dam sel midang khat chu hedman lu a, ana pehson man thei kit ahi.

Isolation or quarantine ibol a thupi ham???

Hiche hed thei na ding in thusim khat ana veu hite! Khopi 2 thusim (Tale of two cities);

– 1918 lai in, influenza (flu) buhse natna hi, ahung lang in ahi. Tu lai COVID-19 dinmun tobang a, buhse nat nahi, leiset a hung thah umdoh natna ahijeh in, mihem te din doulal ana um lheh in ahi. Adeh set in Philadelphia gam a hin, govt in nahsah lou tah in, kiven ding gel lou in millitary parade mi 2,00 ,000 val in lam ana jot sah un ahileh, ni kho khat jong lhing lou lai in, a khopi sung uh hospital chu thakhat in adamlou a na dimset in, ni 7 sung in mihem 4,500 ana thilo uvin ahi.

– Ahin, hiche buhse natpi lan lai mama in St Loiuse khopi in natna ki hed doh na ni 2 jou vin, schools, playgrounds, Hou Inn (church) lockdown ana bol un, mipi 20 kalval kiloikhom ana kham uvin ahileh, hiche nat na a kon a thi hi ana lhom lheh in ahi.

Hiche khopi tenia muthei chu, a dammo mi jat chu ana ki bang kha ta jong leh, a phat chu thakhat thu hilou a (St Luoise khopi tobang a) , ol ol ahiteng leh mi tampi ana ki huh doh jou ji ahin ahi.

Hitobang a mipi kiloikhom ho aki tin a ahileh velkhat or thakhat thu a adamlou hung tam lou ding, chuteng leh hospital lupna, natongho, lou tiho chu a phadcha a damlou hon a mu thei teng leh mipi thiset na chu um tam lou ding tina ahi. Epidemic (natpi lang) teng leh thiset na hi, thakhat thu a a damlou hung tamji jeh ahin ahi (spike of disease curve).

Koitobang ho chung a ichan gei a sose thei ham???

– Covid19 hi mijouse chung a lhung thei ahin ahi. Adeh a 100 lah a 80 tobang hi ahan lang kum 60 chung lam ahinom in ahi.

– Lungchang natna nei(heart disease patients) ho hi 10.6% tobang ahin.

– Diabetes nei ho hi 6.3% tobang ahi . (tichu adammo 100 lah a 6.3 hi diabetes natna neiho)

– Chop nat nei(asthma, copd, ja ha chep jeh a nat) ti ho hi 7.3% ahin ahi .

– Adang a thisan hatjou ta lou(AIDS, TB, CANCER, Paralyse ho) ho ding hi 5.6% ahin ahi.

COVID-19 natna hin itahsa chung ipi pi a boldoh thei em???

-Hiche COVID-19 hitpi hi ihaihu(breathe) ahilouleh ikamsung a kon a kihop lut a, i haina gui(airways) chuleh i chop(lungs) chan gei lhung thei natna hitpi ahin ahi.

-Hiche hitpi hi i hoplut lut leh ki dammo lei ahipon, ahitpi hin ama chi ahin kisem na ding hin phat a la in, hiche phat chu mi jouse a aki bang pon ahi. Ahin hiche hitpi in a chi akisem na aphat lah tam pen chu ni 14 sung hi ahin ahi.Akim khat ding a chu ni 5 hithei(ni 5 jouleh dammo thei), kimkhat ding a chu ni 6,7 hithei, atam pen chu ni 14 hi ahin ahi.

-I Chop sung uva hi cells(hinna tibah neopen) hi chi 2 um ahin, type 1 hin chop a hui i hoplut hou hin, thisan a peh a, thisan a kon a hui theng lou hochu ahin le lahdoh kit a, hiche huithen- glou(CO2) chu i nung haidoh ji uva, hitia chu tahsa a hui theng toh huithenglou ki khel to ji ahin ahi. Aban a type 2 cell pa hin, chop sung a huitheng toh huithenglou teni kikhel tona ding buh neocha(Alveoli) chu a dinsah jou ahin ahi(Surfactant).

Corona jen na a tuchan a lou kimang ho:

– Ramdeseir (hiche lou hi clinical trial a um nalai ahi)

– Chloroquine/hydroxychloroquine ( Hiche lou hin, corona hitpi type 2 cell a lutna din g akham tang thei ahi.)

– Ritonavir ,Tocilizumab (antivirals) kiti ho jong a damlou ho jen n in aki mang in ahi.

CONCLUSION:

COVID-19 natpi kivendoh dingdan;

-Khutsop jing ding, alhom pen a second 20, ahilou leh hand sanitiser >60% alcohol base beh jah jing ding.

-Mask ki tom ding,adeh a N95(95% of parti- cles are absorbed tina ahi.Pam lang a kon huithenglou a kon ki vendoh thei na mask ahi) or surgical mask(hiche mask hi a dam lou, khut,fever nei hon mi pehson lou na tei dia jah ding ahi. Ei ma a hung kon huitheng lou ho chu i heng, ikom ho vendoh na hiche mask hi jah ding ahi)

– Ahithei chan a jachep, dumom neh val bol ta lou ding, ajehchu hiche natpi hi chop nat na ahin, kum sotpi jachep mi nahileh, nang chung a khoh setei natna ahi.

Khangdong thahat lai hijong lechun, potdoh le bol hih in, nang potdoh le jeh a,midang a teh,aveise khat in thina ato na thei natna ahi. Eima dai(responsibili- ty) in kilah soh kei ute. -Social distancing jui cheh ding.

-Aphat cha a imut ding(nikhat a alhom pen a 6-7hrs) -Aphatcha a bu neh ding, Aphat cha kisin sah ding ahi. 

-Ki ngailut to, pankhom, iki thuman to uleh hiche natpi gal hi ijo tei diu ahi.

Hiche article hi KSOD Lamhil April issue a ana kiso hung kiladoh ahin Dr. Tingneo hi MD, Medicine LNJP Hospital, New Delhi chuleh Dr. Sennu Mate hi MBBS jil lai ahi.

NEWS &ARTICLES

SUBMIT YOUR ARTICLE
Scroll to Top