MALAM NO IN KALSAO SEP KIT TAU HITE’

 By~ By: LS Kipgen (Luntin Sat Kipgen)

New Delhi: October 5th 2018

Kum 1940’s bul lang chu ivet leh Norteast Frontier a cheng nammi ho chu British te in adalhah ding kon anahi tolhon in, ama namsung cheh a lekhasim a khohetna neiho chun analamkai cheh uvin ahi. Adang tamtah um jong leh Kuki te leh Naga te politics bol dan a vetkah u hitin, chuleh Lushai Hills a Lusei te in Mizo politics abol to jong vetkah u hite.

April 1945, the Deputy Commissioner of the Naga Hills District, C. R. Pawsey in “Naga Hills District Tribal Council” anaphutdoh in, hichu 1929 a kipat ana um “Naga Club”kiti khel dinga anabol ahin,Mayangnokcha le T. Sakhri chu chairman lesecretary ahilhon e. Hichu kumkhat jouvinFebruary 2, 1946 nikho in“Naga National Council” (NNC) in ahinkhel kit uvin, Eno T. Aliba Imti Ao lehT. Sakhrie Angami chu president leh secretary ahung hilhon tai. Naga Hills DC pu in akipumkhat diu anakhohsah peh uve.

India in chamlhat ahinmu jouvin NNC president pu chu Indian Frontier Administrative Services in alut in ahilehVizar Angami chu president ahung hikit in, chomkhat jouvin Angami Zapu Phizo in ahin khelin ama hi NNC president athum channa ahi. Chuti chun December 1, 1963 nikho in Nagaland state ana kisemdoh in P. Shilu Ao chu chief minister masa pen anahie. AZ Phizo in vang NNC alamkai in, chamlhat galsat ajom in, hichu tukhang in NSCN ahitai. NNC kiphudoh a kipat kum 17 sung in Nagaland state anamu uvin ahi.

Kuki te in Kuki National Assembly (KNA) chu 24th October 1946 in inaphutdoh uvin, Pu Zavum Misao leh Pu Thangkhopao Kipgen, chu president leh secretary masapen anapo lhon e. India in British te a kon a chamlhat (independent) anamu ding kumkhat masang chu ahi. Politics lam ah anamusao jep leu hen, kalbi sao tah inason thei u ahi.

Hinlah vangset umtah in KNA chu adoi le atup molso manlouvin, lamkim ah ana chimlha ta’n ahi. Akiphudoh kum 10 jouvin lamkai ho chun nampi Kuki ngailut sang chun ama ama phung leh paobah anakhohsah jo ta’uvin ahileh kibungkhenna anaum dohtan, hiche kikhentelna chu 1956 kum in government of India in tribe recognition in eina namdetpeh tauve.

Tunikho in vang ivetleh hiche tribe recognition hi ithupisah lhehta uvin, politics jong hiche hi achaina le ajona dan in ikoi gamta uvin ahileh hiche tribe ho kalval a namna toh ding, thalejung sen ding, sumlepai to ding ingaito tapouve. Anglo-Kuki War Commemoration jong tribe min in imangpan tauvin, ikigopkhomna u Kuki min a kibolho ah lunglut tah in pan ilatapo uve.

 

Tun aban in Mizo min ahung umdoh dan leh anatoh u gahve u hite. Assam state sunga um Lusai Hills gam ah chun goga (maoga) jeh in jucha thohlel in anapung in, chang le min kitu jouse anehchai phat uvin, kiel analhata’n, hinlah government in ananahsah tapon ahi. Hijehchun, Pu Laldenga in Mizo National Famine Front (MNFF) chu 1959 in anaphutdoh in kiphinna anabol un ahi.

 

Chuin MNFF chu Mizo National Front (MNF) in October 22, 1961 kum in ahinkhel un, 1966 kum in kiphinna nasatah ahinpan un, chamlhat galsat ding in thingnoi ahinpan pai tauve. Ginthei, kichat thei leh thil lentah suse thei a akiphin jeh uchun, 1986 kum in Government of India toh Mizo Accord tichu “Mizo Kinoptona” khuthei (soi) anabol un India a kon potdoh ding khel chun, India sunga um ding ti’n ananom uvin, Mizoram state anamutauve.

 

 1940’s laiya kiphinna ibolkhompi ho u ipitia lolhing a eiho ilolhinlou u ham veu hite. MNF hinphutdoh Pu Laldenga hi Indian army Havildar anahi in, ahaijou in Assam government noi ah Accounts Clerk na anatong kit e. KNA anaphutdoh lamkai ho ivet leh MNF anaphut dohpa Pu Laldenga sanga lekhalam a sangjo leh government natoh jong lenjo anahiuve. Akiphudoh kum jong KNA-1946, MNF-1961 ahi’n KNA chu kum 15 a masa anahie. Akibahlouna chu ahileh MNF pa in anam ngailut jeh a anatoh adalhah a, KNA ho in government lhakang louva namna anatoh u ahi.

 

Lushai pao tho ho dinga Lushai hills ana um vang chun, Pu Laldenga in Lushai phung chu kiletsahpi in ananei po’n, anatuhchah khehpon, chusang chun Lushai a kon in atouchop in, Lushai pao tho asopi jouse chu Mizo ah anakichopdohpi e. Hiche hi “a giant leap forward” kiti politics a amam a dia kalsao tah songpa anahitai. Tunikho gei in, British record a um chu Lushai joh ahi tia seipoh ah khat a khat jong aum po’n, Mizo anabol u jong akisih pouve.

 

1946 kum a anakipan KNA vang chu kum 10 jou 1956 kum in eima eima paobah cheh ah lamkaiho pum in iboncha uvin inakichomlha tauve. Hiche hi “a giant leap backward” kiti politics a kalsao tah nungchop te ihiu ahitai. Pu Laldenga kitouchop inamuphat uvin, chomkhat anung inajui uvin, hinlah inajui lhung pouve ajehchu chomkhat lung husan a chatloh inahi jeh u ahi.

 

MNF dalha in, Pu Demkhoseh Gangte lamkaina in KNA mama ah ihung kinungle kit uvin, China chan kenglam inajot uvin, galsat kithemchuhna inabol uvin, hinlah vangset umtah in China a kipat ahung lhun lhun vuin, June 1975 chun Pu Demkhoseh Gangte lamkaina in surrendered anabol doh kit tauvin ahi.

NEWS &ARTICLES

KOIHAM KA LAMKAI ?

 By~By Thanggoulen Kipgen “Aw kanam mite kadalhah peh uve, Katoh ban bangkhai,Jinga inam khankho ding gelnanTunin kapedoh tai toh bangkhai”

Read More »
SUBMIT YOUR ARTICLE
Scroll to Top