A Critical EVALUATION of the Life , Works and Enigmmatic Personality of Dr. T.S Gangte

A Critical EVALUATION of the Life , Works and Enigmmatic Personality of Dr. T.S Gangte

Pic: Dr. T.S Gangte

By N.Lhungdim, Thangting House, Molnom- West | Date- 03/08/2020

Dr. T.S Gangte hi amin lhinga Thangkhomang Sielpho Gangte ahi. Official a polam a Mr/ Dr . Gangte tia kihe Manipur a milham hon Mangcha tia kihe a kikou ji ahi. Keima tahin jong Pu Mangcha kana ti jin ahi.

Pu T S Gangte chu November 30, 1932 in ana peng in apa Pu Lalzalien anu Pi Thangkhoneng ahi. Ukhrul M.E School , ah Class VI chan Japan Gal  masang in lekha anasim in abana Johnstone High School, Imphal  ah 1954 in Matriculation ana chaiyin  St Anthony’s College, Shillong ah Graduation 1960 in  ana chaiyin , M.A Sociology in Delhi School of Economics, Delhi University ah 1963 in ana chai in ahi, 1990 kum in Calcutta University, Anthropology Department a Ph.D ana mun ahi.  Churachandpur College aphudoh masang in Gandhi Memoral High School ah chomkhat Head Master ana hin ahi. Churachandpur College adalhah jou in Director of Education, [U]Manipur anahin Manipur a thing lhang mi Director of Education [U ] masapen anahin ahi, chu a kon’a a-haijou in  Council of Higher Secondary Education, Manipur Founder Chairman ana hikit in , Chairman of Secondary  Board, Manipur jong ahin ahi .

Dr. T.S Gangte hi 1964 masang chun kana kimu kha lhon pon hejong kana kihe lhon pon, ahi’n. B.A ka Exam jou 1964 a July lha a Gandhi Memorial High School Pu. Holkhomang Haokip in Molnom kho a 1963 April 15th ni a ana phudoh hiche School kipat til til’a chu oja dinga kana lut leh, chuche phat laia teacher lah a Headmaster Pu. Holkhomang tilou Graduate dang aumlou jehin, school Managing   Committee hon Assistant Headmaster a appointment ana pe uvin  ahi. 1965 kum chu hiding in kagingcha’in Pu. Holkhomang Haokip chu Delhi University Ramjas  College a M.A Political Science ana sim chu ajinei jeh ham a Exam joulou a ahin dalhah jehin school a kon in M A Exam dinga suty alah kahin Pu. T.S Gangte chu Acting HeadMaster dingin ana pang in hiche kum a chu kahung kimu lhon a kahung kihet pan lhon ahi.

Hiche phat laitah chun Gandhi Memorial High School, Secondary Board of Education, Gauhati, Assam a recognition class-X HSLC Exam theina dinga recognition kidel laitah ahi in, hiche recognition chungchang ahin Pu T.S Gangte leh aloinu Pi Lhingjaneng Gangte thanei na jehin recognition eihin peuvin SEBA in recognition ahin pehna official information akimulou vangin aman hoi’a alah ham recognition order Memo ho ivetsah in keima tah in jong kana mu in ahi.

Chomkhat jouin Pu Holkhomang Haokip Exam jou a ahung kinung le phat in Pu. T.S Gangte in Churachandpur College phudoh na ding pan ana la pai-in hiche Churachandpur College phudoh na dinga Governing Body a doh leh son a ana nei chu Pu Thianlam Vaiphei chulai a Churachandpur High School a Headmaster leh Pu Pauneikhai Vaiphei, Ex MLA ana hiuvin ahi.

Pu. T. S Gangte hi veitamtah kakimu lhon a kaki houlim pi vangin het hah tah mikhat in kana mu in ahi. College Office a Principal ahilai a kholai lenga iche leh phatah in eina lamto in a table mai ah akitou in aman tanglou beh in lekha a sun in na atong in kihoulimpi tiho aum ngaipon akom a itou laise a eiman thusei ding ama in thu chengkhat chengni bou asei a kium ahijeh in kei mihi natoh akitoh in kahepon ahi. Kei umdan leh che pi dan chu ahi leh  kholai leng ahung leh phatah a kihoupi’a, ihetna kiseipeh to ding, visitor pa a kona chu ipi hetding leh lahding um em tihi keiman Govt. Office a na katoh lai a kana chepi ji ahi, hijeh chun mi visitor kanei leh file soi bolding ho tailou chu natoh gun kabol lou ahi. Hiti hohi kanung vetleh Pu. T.S Gangte hi Enigmatic and Unique Personality nei khat in kamu in ahi. Enigmatic kiti hi dictionary a ivet leh difficult to interprete or understand ahin, mysterious tobang mikhat a kahet ahi. Ipi agel kihe theilou imacha seidoh lou to kihou chu thil hahsa tah khat ahi ajehchu kihou kiti hi mi 2 kihou ahin mikhat keo keo ahilou leh ama chu ama chang in aki hou e tia mingol dan a kisei ji  ahi.

Pu. T.S Gangte chu a chihdan chu agil in koima hetphah dingleh matphah ding jat ahipon ahi. Hiche tobang mikhat ahijeh a chu Churachandpur College chu aum lou beh a kon a ahin gon a College umna ding jong tua gam khute te Churachandpur College in atoupha ding khu koima chan kihelou ahi. Churachandpur College location hi ivet leh Lamka town sunglai tah a mun nomtah mun lhingtah Multi storied Building kisa henlang hileh Churachandpur University jong phudoh nathei hiche tobang town sunga Higher Education um nathei na ding hi adang um talou ahi. Chuche phat laia Churachandpur College masang a ana kiphutdoh Sielmat Christian College jong Pu L Thanzaua Pudaite IFS, ana mu pa chun, influential tah ana hijeh’a adeh a masang a Union Christian College, Barapani a Principal a ana pang Dr. TJ Taylor Guwahati University a Vice Chancellor a ahung pan jeh’a Sielmat Christian College chu nasatah a dopsang a ana um a Principal pa Pu Rualneikhum Pakhoungte jong Guwahati University Court a member ana hikha ahi. Ahinla asung langa boina ipi ham jehkhat in funding phalheh jongleh chomkhat jou in ana beidoh tan ahi. Aban ah Lamka town a mi phabep khat in Churachandpur College toh kitet ding in Lamka College ana phutdoh kit uvin a promoter ho phalheh henlang hijongleh College location chu New Lamka lang ahijeh in tu in lampi hoi in kinai lheh tobang in um jongleh chulai phat a chu khopi pamlang jot le hahtah khat a aum jeh in College phadeu Principal T.S Gangte tobanga ching le them Education a committed  leh devoted Principal College chu keia[ my  own ]ahi tilou a mi College a natong dan a ana kigel jeh uvin tuni chan in Govt. College hijong leh ahiding banga khangdoh theilou in aum nalai in ahi.

Adihtah a chu hiche Educational Institution High School hihen lang College hijongleh aneipa tobanga kigel khat aumlou leh mi institution a natong ho chun thuneina leh thanei na jong adei banga anei joulou, hiche jeh’a chu tulai a jong Churachandpur town a School hoijep iti hohi aneinu aneipa kiti khat aum jeha hoidoh ngen ahi. Rengkai a Young Learners’ School YLS kiti khu a Principal nu Pi RamsiemzoTusing  khu anei ahi in numei  kidang tah khat ahi. Hijeh a achih athep jeha Churachandpur Town a High School lah a No. 1 ahi. Tuibong langa School hoi dompen chu Laizon Veng a Salt Brook School kiti khu ahin. Salt Brook School Principal Pu Vanlallien Haokip jong hi mi kidang khat  ahi. Imacha umlou a kipan a tua school hoipen leh phapen khat a ahin semdoh hi Education a Committed leh Devoted ahi khu kidang ahi. Amahi drug addict ho banga Schooln a khu addicted, 110 % beh attention apeh ahin ahi. 24 hours sung ahin hour ija mong a school gel lou in aum dem? A an neh pet a kisil pet injong gel inte. A imut kah tilou a hi a School agel lou ding katahsan pon ahi. Hiche tobang a chu mikhat in alung atha 100% apeh leh a natoh na a chu success lou koima umponte.

Pu. T.S Gangte @ Pu Mangcha hi aching lheh in athepna chu mi  chungchon a themjong hilou maithei ahi. Ama tobang miching chu thinglhang milah a hung um kit ding in kagingcha pon ahi. Ahinla keiman kahet dan leh kamu dan a achih lheh vang in alhinlel jepna kahet chu a College hi pansah na sang a alen leh  asang jep khat lhun na dinga agel ding leh atoh ding a kilomlou phabep pi jong ana tongdoh in ahi. Senior IAS Officer Pu K Kipgen totna na tobang in T S Mangcha hi thil abol thei beh in achapa jong khu IAS hin hisah bouvin te anatin ahi. Ama power and influence capability chu unmatched mong mong ahi. Amatobang ahung penkitdinghi ginchat aum pon ahi.

Vetsahna dingin a Principal chan khompi Thoubal College a Principal pa hamtoh Burma langa phalna neilou in agalut lhon in Burma hon ahin man uvin Burma jail ah aum lhon in a minset lo kei in ahi. Ahivagin Burma lang a kon in jong ahung ongdoh in Manipur a jong a Service a unscatted lou in a umthei kit in ahi. Hiche to kimat a kajah khatchu masang a Professor, Churachandpur College Govt. natoh na a kon a hai a houlam a kipe Rev. Dr. Th. Lamboi Vaiphei in khatvei Patkai Christian College, Dimapur a Student  Camp khat a Speaker thusei a kaga che leh a Principal pau Dr T. Tuisem in hoia na natoh ham tin eidong in Churachandpur College a ka toh ahi kati leh Principal koiham atin T.S Gangte ahi ka ti le Oh! T.S Gangte,T S Gangte  kahe tai, kahetai, tell him not to go Burma again tin asei in ahi.

Adangkhat chu ahikit leh kanaopa Ngulkhohao Lhungdim, chu D M College ah B.A Political Science Honour ahivang in English literature langa themtah khat ahi in B.A English subject a chu 50% val amu ahi. Chomkhat anatoh kisuh lou lai in Churachandpur College a English Deparment a Demonstrator @Tutor in Pu.T.S Gangte in ana pansah in chomkhat jou in Tutor ding in qualified ahipoi ati in anatoh ahin haisah in ahi. Ahinla chuche jou in D.M College a English Dept. a Tutor ahung kihong in apply abol leh bailam tah in amu kit in 1974 a MLA atet chan chun ana pang in ahi. Govt. College a Tutor dinga qualified chu Private  College a Tutor dinga qualified ahi lou chu het hah satah ahi.

 Pu. H. Chinkhenthang IAS ahi masang in Lecturer in chomkhat Churachandpur College  ah a’na pang in ama in a Autobiography a asutna a chun Dr. T.S Gangte chu Principal without Principle ahi tin asun e. School hihen lang College hijongleh Headmaster/ Principal ho chu a institution a chu asun ajan a aumlou leh thuboi laboi um jing, aphatseh a aumlou leh a School, College chu adeibang’a  um theilou ahi. Hiche lang a hin Pu. T.S Gangte chun lhinlal na tamtah anei in ajehchu ama chu amun’a  umlou in atamjo Imphal a Old Lambulane ah apansa in ahia ahung phat phat leh anoi a natong ho asun ajan tobang in na atohsah in ana boithei lheh in ahi.

Tulai a digital TV hungso jou a gamla tah a kon a TV remote control a channel idei dei kilheh le le tobang a Remote Control dan a Imphal a kon a Churachandpur College ahin vaihom chu alhinlal na, alhahsam na umtei ding ahi. Aban’ah College Principal a kon in kidang-tah leh vangphat umtah in Director of Education[ U]ahung kaidoh in, Director of Education ahilai injong, khatvei a Office ah kinkhat in kagache in kaki muto pi in Manipur a Principal jouse amai ah atou sah in a disciple tobang  in  deibang a kihoulimpi thei jong hilou in aum in ahi.

Hiche style of functioning  chu keiya toh opposite ahin kadetmo tah khat ahi. Ajehchu kei vang in ka office a visitor kanei leh kanatoh kakoidoh a kaki houlimpi a ama ho a kon a ipi hetdoh lahdoh ding kahetnom ho kadoh a, file urgent a um leh sign kabol tailou tohding serious lou ho chu kanung’a  File Rack a kakoi doh ji ahi. A office iche a anatoh bou boipi ho hi kanung che ji lou ahi.

Achaina in ajinu Pi. Lhingjaneng nominated MLA anahi chu Elected MLA ahina dingin Henglep leh Saikot a candidate jui in  aboipi kit uvin hiti hojeh chun atup leh adoichu phamo hih jongleh tha le jung lungthim senga ana phudoh Churachandpur College sang chun a khohsah joh leh alunglutna ana tam jeh chun Churachandpur College jong ahiding bang chet ana hi joupon ahi. Infrastructure langa ana lhasam in  Building leh Class Room ho jong deibang leh ahoi nading bangin tuchan in aum naipon ahi.

Achaina kei in 2000 laichun Dibrugarh a ka umlai in Kuki Inpi Manipur hon Anglo Kuki War Sadya gam a housa len ho open jail a ana um na mun uchu kana boipi uvin, hiche ho boldoh na dingin Anglo Kuki War Patriots Memorial Foundation Public Charitable Trust khat keima panlah na in kana gongdoh uvin ahi. Khonung a donation kimu ho Income Tax Exemption mu na ding in Income Tax Act, 1961 a Section 16 leh Section 80b noi a Exemption ding jong ka retire ma in kana boldoh peh uvin Pu. T.S Gangte leh aloinu jong ahung kholjin lhon in keima jaona in Sadya gam a kholjin in kaga che uvin hiche Trust kisem chu Pu. T.S Gangte chu Chairman ana hi in, Managing Trustee chu Pu Haojakam Chongloi ana hi in ahi. Hiche min chu mangin Assam Govt. kom a gambeh khat akithum in, ka retire masang a akiboldoh manlou vangin, khonung in Pu. Lamhao Doungel, Assam Police Service a Additional S.P Tinsukia, pottho na leh panlah na jehin, Assam Govt. in gambeh bigha 4 eina peuv’in ahi. Khonung peh in hiche Trust meeting chu Old Lambulane a Pu. T.S Gangte inn ah kanei uvin, kei jong vei tamtah kaga pang in, Pu.T.S Gangte hi thinglhang mi lah’a ka ngaisang loitah khat ahi. Miching tah ana hi a Churachandpur College ana phudoh a Govt. College ahung hi a, tua Churachandpur a kon a Govt. Gazetted officer 40/50 in tohmun amulo in No.1 Gazetted Officer Creator ahin, mitamtah in  phatah a service ahin  muthei hi pachat louthei ahipon ahi. Ama ana um tahlou jeh chun alhinlal na leh alhahsam na ho English poem Bridge of Sighs a Thomas Hood in  nungah khat adongma pan akhen [jilted] jeh a London a Waterloo Bridge  a achoplhah a athi chu, a chonset naho jouse kichai ahitai, ngaidam ute, achuti louleh Christian Charity [kingailutna] chu hoi a um hitam? tia ana sei chu geldoh ute, ajehchu Lhin lalna neilou  koima aki umpon ahi.

Pu T S Gangte  Social lam a  popular theilouna khat chu a kaina Christian denomination chu Community a midang toh kivop behseh  lou leh kitimatna lhom ahi jeh in  Gangte Mainstream [vadung a len] ana kijap leh a Social life leh activity ho chu hoicheh leh phacheh ding ahi, ajehchu CHRISTIANITY IS ESSENTIALLY A SOCIAL RELIGION ahi tia Pathen  thusei-minthang John Wesly in anasei chu Christian ho chu, kivop khom’a social hi chu; Essential  part of Christian Life ahin ahi’.

Pic: Dr. T.S Gangte

NEWS &ARTICLES

VANNOI HOTLING CORONA NATNA

By Dr. Tingneo & Dr. Sennu Corona “crown like surface spikes” ti chu ‘linglukhuh tobang melpu’ tina ahi. COVID-19 co(corona) vi(virus) d(disease) 19(2019). Hiche natnapi thu a apoimo ho hi

Read More »